عتاب الدنيا
قالت انت.. وقلت هذا انتي عرفتي
ماتغير شي من يوم الرحيل
استريحي .. ليش وش علمك وقفتي
قالت..اصلا..مالـ..هالصدفه مثيل
شفتك امس..وقلت شفتيني وطفتي
قالت ادري بس ماخبرك نحيل
ماعرفتك..قلت هم انتي نحفتي
والشقي ياصاحبي عمره طويل
مانصفني حظ...وانتي مانصفتي
دايم الدنيا على مثلي تعيل
مرت سنين على حب قطفتي
ومرت دهور على قلب عليل
ظامي وارويه من حلف حلفتي
والتمس لي فيه عن قيضي مقيل
انتي اخر من تصورت انجرفتي
ملتي اول مابدا وقتي يميل
لا سؤال ولا تعبتي لي وشفتي
من لبستي في هاك الليله كليل
باكر تقولين لختك من صدفتي
قالت اصبر وش بلي هرجك ثقيل
انشد عيوني كم دموع ذرفتي
في هاك الليله وكم يومن وليل
وانشد ضلوعي كم لحون عزفتي
من ونين ومن غرابيل وويل
خوفوني لا تقول اشلون خفتي
تحسبن اللي حصل ليه قليل
عاتب الدنيا معي قل ماعطفتي
مالقيتي للقدر غيري بديل