قصيدة للشاعر عريان سيد خلف

اليكم القصيدة

ضمني ابليل ثاني وحل حلال الخِل
شحيحه افراحنه ودكانهه امعزّل
البسمه انبوكها من الآه والياويل
وصياد الهموم ابدفتره ايسجّل
ياكلبي اشبعد ؟ ومعكرات الكيف
زمّن تُوزهن ما ضن بعد تحمل
يولنّك ضواري امهذبات الناب
لامخلص يعينك لو ردت تجفل
يمشاجج زمانك حد كطاع النيط
تترجه الشفه وشكواك سِل السل
لاعاد الصبر يلجم مصب العين
ولا مثل الخلك بدموعنه انمثّل
ولاذيج المضايف عاجده الديوان
ولا سِربة وذِن برياضهن تصهل
ولا شارب يرف لو مطكت أم إعريف
ولا شكرة جعد بوجوهنه تهلهل
ولامدرع فشك ينحر صدور الخيل
وما بين اللميض ايحوّل اتحوّل
ولاصاحب ذرب ويوجّد الماذيك
يبسط خاطره وفوك الجرح ينزل
مصخت والضماير غبراهه الغيظ
وامتد الدرب وام الفرح مِثجل
وطالت والعمر كلما تلف بي طول
غم ذاك العمر من ينكضي تعلعل
شي عاشت لفو وتروم هذا وذاك
وشي كضّت عمرهه بنعم وتوسل
وشي حربة مواسم تنبت ابكل كيف
اشما بدل وكتهه الحالها اتبدّل
وشي تلهث عمر تجمع ورق وارقام
لحد كطع النفس وبمالها اتنعثل
امناحر والخلك ما تعرف المعروف
ماخذها الطمع وبلا سبب تكتل
ما ني من ارد اسولف واكشف المغلوك
يغدي الحك صبر وحجايتي اتزعّل
يالشعرك مليّل حل حلال الخل
وطول واهسّك للواهسه امخيّل
اسلم من عذاب الآه والياويل
وعللني بهواك العافيه اتعلّل
يا تالي المزن جل العمر عيسوب
فوك امروز روحي الزور صاير جل
مدنف فوك وكري ابطارف الصعبات
وصكور الروابي العاليه اتزبّل
مشكلتي الفرح ما اعرف بابه امنين ؟
وبلون الحزن من زغري متمشكل
ناورني الدمع باول مدب عالكاع
وناغمني الحزن وي رنه الجنجل
ضميت الصداكه لساعة الكلفات
وحزرت الذخر لن جودهه موشّل
حِل شعرك حبيبي الليل باجي يطول
لاخيط الفجر يستعجل من ايهل